Panahon ng KUWARESMA

                                                Panahon ng KUWARESMA

        Kailan lamang ay atin ng sinariwa ang ating pinanggalingan ang "ABO" nung nakalipas na "Ash Wednesday". Ito ay ang hudyat na nagsimula na ang panahon ng kuwaresma. Ito din ang nagpapaalala sa atin ng pagpapakasakit ni kristo upang tayo'y tubusin sa ating mga kasalanan.

       Ano nga ba ang tinatawag na Kuwaresma? Ito ay ang apatnapung araw na pag aayuno, pagbabalik-tanaw sa mga ginawa ni Kristo upang tayo ay matubos sa mga kasalanan,pagpapatawad,at mataimtim na pananalangin sa Panginoon. Ang pinakahuling Linggo ng Kuwaresma ay ang pasalubong sa muling pagkabuhay ni Kristo.

      Karaniwan sa ating mga Pilipino ay nagkakaisa tuwing panahon ng kuwaresma. Makikitang sabay-sabay na nagsisimba at nagpapabasbas ng kani-kaniyang mga palaspas sa araw na tinatawag na "Linggo de Ramos" na gumugunita na sa araw na ito ay ang padating ni Kristo sa Herusalem. Nadarama natin na ang Mahal na Araw ay nariyan na kapag sumapit na ang Lunes Santo,nagsisimula na ang mga aktibidades ng simbahan, medyo nagiging tahimik na ang mga lugar,lalong painit ng painit ang panahon at tuluyang tumatahimik pag Martes Santo, Miyerkules Santo. Pagdating ng Huwebes Santo ay idinaraos na ang "Huling Hapunan", dito rin ay isinasagawa at isinasabuhay ang paghuhugas ng paa ng labindalawang lalaki na napili bilang mga apostoles ni Hesus, na noo'y ginawa ni Hesus. Sa Huwebes Santo din nagaganap ang tinatawag na "Pabasa" sa iba't ibang lugar, na matatapos bago ang oras ng kamatayan ni Kristo. Pagsapit ng Biyernes Santo, isinasagawa ang ritwal na Pitong Wika o ang Siete Palabras. Nagsisikip ang mga simbahan tuwing Biyernes Santo dahil nais ng mga taong mkinig sa mga huling salitang iniatang ng Panginoong Hesukristo bago siya tuluyang pagkamatay dahil sa pagkakapako nya sa krus.Sa araw na ito marami din ang umiikot ng mga simbahan sa iba't ibang lugar upang makapagsagawa ng "Istatsyon ng Krus". Ang Sabado de Gloria naman ang nagsisilbing paghahanda para sa pagsalubong sa "Muling Pagkabuhay" ng Panginoong Hesuskristo sa araw ng Linggo.

     Sa pagsapit ng Linggo ng Muling Pagkabuhay, nakadarama tayo ng panibagong buhay, bagong pag-asa, dahil sa pagkakalaam natin tayo'y kanyang muling tinubos sa ating mga kasalanan. Kaya't sa darating na Mahal na araw, tayo ay mag-ayuno,magdasal at magpatawad gaya ng ginawa ng Panginoong Hesukristo para sa atin.